Uaxastanastia jurhiatikuecha tsïmanki anchikuarhinaka uexurhikuarhu 2023-2024: SEE

Morelia, Michoacán.- Secretaría de Educación del Estado (SEE), Gabriela Molina Aguilar, eiankuasti jorhemperichani, ka tatempechani sapicheri enki uaxastanakia calendario oficial i uexurhikueri 2023-2024, Secretaría de Educación Pública arhikatampu.

Jimposï juramuti jorhenkuarhikueri p'imarhiasti iamintuechani enki jorhemperakuecharhu nitamajka enki eranarhikuakasi calendario arhikatani, enki uaxastaka jaka Diario Oficial de la Federación (DOF) arhikatarhu, ka menki jauenani exeni ampe enki monarhitakasi.

Ka itku, sesi erankusti anchikua jorhempericheri erechikueri enki k'amarhutanauakasi jorhenkuarhikuechani, jurhiatikuarhu 19 kutsiri julio, ka nitamansï jorhenkuarhikua taller de formación continua, enki k'amarhuaka 26 de julio.

Gabriela Molina uantasti enki matarhu uexurhikua jorhenkuarhikueri uetenakuarhiaka jurhiatikua 28 kutsiri agosto i uexurhikueri, ka isï uatisï jorhemperakuecha sapicheri ka Normales arhikatecha, ka uatisï eranarhikuni DOF arhikatarhu: https://www.dof.gob.mx/nota_detalle.php?codigo=5693346&fecha=26/06/2023#gsc.tab=0

Uetarhesïnti eiampeni enki uexurhikuarhu 2023-2024 nitamasïntisi 190 jurhiatikuecha jorhenkuarhikueri jorhemperakuecharhu jimanki meiampenajka ka jimanki no enki uaxastakata jakasï imarhu Sistema Educativo Nacional; ka jorhemperakuecharhu Normales ka Formación de maestras y maestros 195 jurhiatikuecha nitamati, jurhiatikuechankuni enki Consejo Técnico Escolar (CTE) nitamaka.

Uexurhikuarhu jauati iumu tanimu kunkuarhikuecha (CTE) arhikatecha, ma Taller Intensivo de Formación Continua enki jorhempericha nitamaka enki jurhiatikuecharhu 21 al 25 kutsiri agosto i uexurhikueri unaka, matarhu 4 ka 5 kutsiri enero mataru uexurhikueri; ka jurhiatikuarhu 3 nitamati juramuticha; ka jorhenkuarhikuechani intsïnatisi 17 al 19 kutsiri julio mataru uexurhikueri, imankuni menki jauenakasï jorhenkuarhini jorhempericha.

Mataru ampe enki uetarhejka miteni calendario arhikateri, jintesti xajkani enki karakuarhiakasi sapicha jorhemperakuecharhu, ka jinteauati jurhiatikuecharhu 1 al 15 kustiri febrero mataru uexurhikueri.

Ka xajkani enki mintsikuarhiakasi, jinteuati invierno arhikateri 18 kustiri diciembre i uexurhikueri ka k'amarhuati jurhiatikuarhu 2 kutsiri enero mataru uexurhikueri, ka semana santa arhikateri uetenakuarhiati 25 kutsiri marzo ka k'amarhuati 5 kutsiri abril; ka jorhenkuarhikuecha k'amarhati jurhiatikuarhu 16 kutsiri julio.